O Proxecto Nós estréase no Culturgal

Culturgal é un evento anual que reúne ao sector cultural e ao público na cidade de Pontevedra. O evento ten como obxectivo crear un espazo de encontro entre distintos públicos, artistas, profesionais e institucións, promovendo a comunicación e a colaboración no ámbito cultural galego. Os expositores, considerados o corazón e o motor da feira, ofrecerán ao público as últimas novidades editoriais, propostas das artes escénicas, música ao vivo e moitas outras iniciativas híbridas relacionadas co mundo da arte.

Este ano, o Proxecto Nós únese á Culturgal co obxectivo de darse a coñecer entre o público. O equipo, que abraza a lingua galega e a tecnoloxía, deterase na explicación dos tres demostradores nos que se está a traballar: o tradutor neuronal, o sintetizador de voz e o recoñecedor de voz. Así mesmo, convidarase as máis curiosas a poñer o seu gran de area nesta aventura, participando no proxecto por medio da recollida de voces. Esta iniciativa centrada na captación de voces de galegas e galegos axudará a facer posible que as máquinas entendan a nosa lingua.

A participación do Proxecto Nós no Culturgal non só resalta a importancia da integración do galego nas tecnoloxías intelixentes, senón tamén a relevancia do evento como punto de encontro para os profesionais do sector cultural galego e o público interesado en coñecer as últimas novidades do ámbito cultural e tecnolóxico. O stand do Proxecto Nós promete ser unha parada para aqueles que desexan explorar a converxencia entre a cultura galega e as innovacións da Intelixencia Artificial.

Vémonos no stand 73!